Blog vs Facebook

    

我Le個古老人一直好唔願意"與時並進，盲趕潮流"，好抗拒FB，好唔想用smartphone，但最近"被迫"使用！
每日時間有限，要返工，要煮飯，要walk乖乖，要整嘢俾佢食，要同佢玩，要做家務，要operate一個blog已經好花精神時間，再要我去打理埋個FB真係無能為力！
至於我唔想用smartphone係因為唔想D老細expect我可以隨時隨時隨地24小時運作！
唔知愛我定害我，今年生日獅子王竟然買咗部S4俾我，跟手"幫"我開埋個FB account！
獅子王話我用開部電話個"Mon"太細，D同事text message俾我要眼矇矇去睇，所以佢買部新手機俾我唔使我睇得咁辛苦wor！(佢有時都真係幾細心嘅)
但估唔到佢用我個中文名去開咗個FB account我都唔知，到我發現時已經係幾個星期後嘅事！最最最離譜係迫我扮80後，喺出生年份填1980年！唔知佢係咪想娶個後生D嘅老婆呢！？Wakakaka
Anyway經過連日來試用FB我發現我都係prefer寫 blog！FB係一個好方便去"八"別人的世界 /生活嘅途徑，當中亦有好多資訊 /訊息，但我卻是一個好enjoy 活在自己的世界裏面嘅人！
我鐘意文字，文字可以好powerful，FB俾唔到Le個感覺我！大部份FB嘅statement都流於表面，一句起兩句止。無疑Le 個就係現代人嘅溝通方法: 一切從簡，最緊要快！做乜都第一時間放上FB share咗先，不過對於70後嘅我，咁樣並唔係我杯茶！
喺FB Le個資訊爆棚嘅網絡世界，我發現咗一個好悲哀嘅現實，就係每日都有好多人唔見狗，又有好多狗唔見咗個主人，更多嘅係有好多無家可歸的貓 / 狗looking for一主好人家！心裏知道世界殘酷係一件事，見到後又幫唔到，往往令我心情沉重！
習慣活在comfort zone嘅我一定會喺Le個地盆繼續爬格仔，同大家訴心事，分享美食，與眾同樂！得閒又會去FB嗰邊扮下後生！Hahaha！