放下心頭大石

自從收到Yahoo blog話要摺埋嘅消息，心裏一直好擔心我嗰1600篇Post。由於我係電腦白痴所以我一直唔識攪什麽back up。雖然最後Yahoo幫大家攪咗個備份，而好多blog友又分享咗好多upload去新blog嘅方法 / 心得，但唔好講笑，我齋睇都唔知佢講乜又睇到頭都暈，唔好話叫我跟住做！
但大拿拿1612篇乖乖blog，仲有二萬幾張開心相，唔係就咁冇哂掛？
香港人一直好有生意頭腦，我自己唔識搬，我亦相信有好多人同我一樣唔識 / 唔想自己動手搬，所以我一直抱有希望，坊間會有人做幫人搬blog嘅Le門生意，可惜，等了又等竟然冇聽到有人收錢幫人搬blog！(真奇怪！)
點算好呢？又忐忑一輪，終於俾我諗咗條"C"橋，就係按個"輕鬆搬家"鍵將乖乖blog搬去Weshare，雖然我唔Like佢嘅版面，但最緊要保得住我同乖乖的美好回憶吖嘛！
10月初按完個鍵等了又等，等咗成十日終於收到email話備份上載完，事隔幾日上Weshare網，乜都冇得睇嘅！？如是者，每隔幾日去睇一次，睇咗3個幾禮拜都"冇料到"網頁仍是空空如也！到底"輕鬆搬家"係咪真係得架？差D想send email去佢hotline睇下佢到底幾時攪掂！足足等了個多月，昨晚心血來潮去睇Weshare睇下，Wow 終於搬好咗喇！！雖然個介面唔吸引，除咗標題外，每篇blog要click入去先會睇到D相 & 文字，同時所有blog友嘅留言都冇哂，但總算一篇不漏，亦將所有珍貴相片自動上載到網頁上，我...終於放下心頭大石！
http://weshare.hk/gwaigwaisze (乖乖舊blog)
我唔會 post 新blog去Weshare，只會當佢係一本乖乖嘅"記念冊"。至於會唔會再將Yahoo俾我嘅備份upload嚟Blogspot？...真係要睇下我放假時有冇時間，精力去研究點做！最好有人話我知有冇人肯收錢幫人搬blog啦，我真係電腦白痴嚟架！！