快D星期六 la

媽咪話我知星期六肥肥貓媽會帶大家姐Ball Ball和我未見過的細妹包包嚟探我呀！我真係好開心呀！

 

快D星期六就好喇，我好心急想同Ball Ball玩呀！


媽咪成日比肥肥貓媽個Blog我睇，又成日問我記唔記得Ball Ball 同貝貝，我話梗係記得la，你估我係儍仔咩？

以前喺肥肥貓媽屋企時我最鍾意同大家姐玩喇，不過唔知點解阿妹貝貝好似靚女咗好多，唔通佢靜靜雞去咗整容？定係冇我成日激佢所以靚咗呢？我估多數都係我的關係，因為媽咪成日話我激親佢，我都覺得媽咪最近好似醜樣咗呀！你哋話我幾勁吖，想D女人靚又得，想D女人醜又得，我將來大個仔一定可以做個出色的整容醫生la。

 

我吩咐咗媽咪星期六耍整多D小食比家姐和妹妹食，唔好失禮我。

 

我仲打算叫契媽帶埋Miu Miu同我個老死Ja B來，因為我想介紹我個女朋友Miu Miu比肥肥貓媽認識呀，等佢幫下眼，睇吓我有冇揀錯都好吖。天父呀，我求你比星期六快D嚟喇！阿門。