乖乖 拖肥去旅行

大家好！我係一隻被寵壞的貴婦狗——乖乖，亦係媽咪既養子，就係今年一月被依家既媽咪收養；因為舊主人話我好鍾意搶狗既野，以前我個妹貝貝就係咁，激到心律不正病發作，舊主人忍痛將我過繼左俾新主人。

好彩依家既媽咪都好錫我，仲有個大佬Toffee（賓尼兔）同住，初時Toffee都睇我唔順眼，成日用個頭衝擊我，我梗係唔赦佢，實行還佢拖；最後俾媽咪捉住教訓左一大餐（如果老豆係度一定打鑊金），叫我唔好蝦大佬，好彩整整下大佬同我又相安無事，最近仲識左同村既Mui Mui、Ja B同Happy，成日一齊去威好鬼死開心。

媽咪話我最近真係乖左，貼近左個名些少；又就快兩歲大，都算係大個仔，而我既生日咁（口岩）同Toffee相差一日；媽咪話我同大佬都未見過世面，所以安排係聖誕節（我地生日就係聖誕）等我地兩個一齊去旅行，參加下派對、飲下啤酒、識下女仔，咁至係大個仔嗎！唔信；媽咪連Passport都同我地整埋！問你服未！

仲有就係媽咪真係非常體貼，驚我地去到外面冇個錢旁邊好樣衰！特登整左兩蚊雞俾我地駛；我梗係炸哂型啦！我話阿媽，兩蚊雞點夠駛呀！食個包、飲杯野都無左啦！阿媽話夠有突喎！唔信你地睇下。