乖乖Miu Miu絕密情信大公開

有相為證，定情信物M字鑽石頸鍊已掛在靚女Miu Miu身上。

 

 

給吳乖乖的一封信

 

吳乖乖公公，

睇到你嘅網誌，連一向懶郁嘅我都忍唔住要回應一下以表心聲！

其實，喺中秋夜當晚，我已經揾到我嘅意中人，不，應該話係意中兔至啱，佢就係你大佬拖肥啦！我對拖肥一見鐘情，一往情深，一片癡心咁望住佢成晚。唔通咁樣你都仲未明白邊個至係我嘅夢中情人？愛情呢家嘢係好微妙嘅，亦係冇得勉強嘅，你醒吓啦！

而且你仇家眾多，如果我跟住你都冇乜好日子過。萬一沙塵滾滾，殺錯良民，我咪好無辜？況且你係男子漢，大丈夫，點解唔同朱古力隻秋吖？朱古力咁大份，你唔駛驚佢會受傷喎！係唔係你驚至真呀？西洋菜 Happy 小姐係我細佬嘅意中人嚟架，你咪橫刀奪愛呀！雖然佢地係一肥一瘦，都算係相影成趣吖！況且真愛係唔計較外表嘅，我同拖肥一狗一兔，夠唔相襯啦！但係好似廣告對白話齋：點解鐘意？因為鐘意囉！況且你哥日失驚無神咁啄咗 Happy 個鼻一下，佢又邊會幫你打氣至得架？現實係殘酷嘅，但你一定要面對呀！我媽咪最憎人冇句真架！

仲有，追女仔係要用小食，唔係用尿尿嘅！你咪成日唸縮數，做埋哂D無本生意啦！我咁靚女，但係比你攪到成身尿味，叫我點出嚟行呀？你唔行外母政策，仲攪到要媽咪返屋企幫我沖身，以後都唔比你見我，你就惨啦！想追靚女，就一定會有好多情敵，你要唸準至好呀！唔通你想要條賣剩蔗咩？梗係要爭個你死我活至夠食カ架嘛！不過我都唔會唔啋你嘅，否則又點有機會上你屋企乘機見你大佬拖肥吖？

從來都冇寫過咁多字，都係為咗你咋，吳乖乖！失戀係最唔好玩嘅遊戲，好 hurt 架！萬一我做咗你大嫂，你就會好似家、春、秋D主角咁，泥足深陷，不能自拔，好痛苦架啦！  

From Miu Miu  

 

給靚女Miu Miu愛的宣言

1.我已經揾到我嘅意中人（男未婚女未嫁；我一日仲有機會。）

2.愛情呢家嘢係好微妙嘅，亦係冇得勉強嘅，你醒吓啦！（Miu Miu可以唔喜歡我；但妳唔可以阻止我喜歡妳。）

3.而且你仇家眾多，如果我跟住你都冇乜好日子過。（狗公唔壞、狗女唔愛。）

4.萬一沙塵滾滾，殺錯良民，我咪好無辜？（不能同年同月生、但願同年同月死。）

5.況且你係男子漢，大丈夫，點解唔同朱古力隻秋吖？（忍一時豐衣足食、退一步風流快活。）

6.西洋菜 Happy 小姐係我細佬嘅意中人嚟架，你咪橫刀奪愛呀！（朋友妻咪走雞。）

7.追女仔係要用小食，唔係用尿尿嘅！（有情飲水飽、飲飽梗痾尿。）

8.我咁靚女，但係比你攪到成身尿味，叫我點出嚟行呀？  （就係唔想妳出黎行咁多，出面好多﹛狼﹜狗。

9.你唔行外母政策，仲攪到要媽咪返屋企幫我沖身，以後都唔比你見我，你就惨啦！（妳阿媽已收左我兩個19幾卡既鑽石鍊咀，咁仲唔行曬外母政策！）

10.想追靚女，就一定會有好多情敵，你要唸唸至好呀！（情敵既定義——就係以第三者身份，沖擊我地情比金堅既感情，公然對妳展開追求。即Miu Miu妳已認定了我係妳條仔，仲係正選果隻，我至有情敵，哈哈！Miu Miu妳真係豪放女。