"中頭獎"！？

睇見個標題...你唔會以為我咁好彩中咗六合彩頭獎掛？
一般人中頭獎都會好開心，Um...但今次"中頭獎"的主角係乖乖，而我...卻暈得一陣陣！心情跌到落谷底！
乖乖今年8歲，我養咗佢7年，佢從來未要我擔心過。但日前佢首次令我食咗一頓最吞不下咽，食而不知其味的一餐飯！
話說數日前我摸到乖乖頭頂有一粒如黄豆般大的硬物，顏色如他的毛皮一樣，我不以為意，以為係油脂粒 (類似人的酒米)，第二朝心血來潮再去check下，覺得有D唔妥，但又睇唔出所以然。叫醒獅子王一齊睇，問佢似唔似insect？有冇腳？我個心最怕係牛蜱 (牛蜱熱是香港狗最常見和危險的疾病之一。牛蜱熱是一種由牛蜱傳播的疾病。牛蜱有八只腳，外形與甲蟲非常相似，但實際上是一種蛛形綱（與蜘蛛同一家族）。牛蜱通常生活在草叢，靠從狗和牛等動物上吸血為生。狗隻患上牛蜱熱，通常會發展為溶血性貧血及會出現發燒，厭食，抑鬱，牙齦蒼白。這些寄生蟲（通常是巴貝斯蟲，或埃立克體）可引起紅血細胞的損傷和破壞。他們也可以在身體引發免疫系統問題和其他併發症如黃疸和胰臟炎等。若不及時治療，會導致貧血因而致命！但不是每一隻牛蜱都一定帶有血液寄生蟲)自己把口卻不斷否定嗰粒"豆"係牛蜱！平時喺facebook見D friend影出嚟嘅牛蜱全部都係啡黑色，而乖乖頭上嗰粒係米灰色，點會係牛蜱呀？ Once again，我同獅子王睇嚟睇去都唔知係乜，"Mit"又"Mit"唔甩，咁一於當佢係油脂粒！
當晚(星期四)約咗契仔奶茶食飯，同茶包講起乖乖頭上嗰粒"不明物體"，好彩佢熱心走嚟睇下，一睇之下Le個"牛蜱博士"竟斬釘截鐵話係牛蜱！Oh My God！當時我真係有D暈，唔知由自可，知道就擔心死，成餐飯都心不在焉、忐忑不安。
茶包不斷講述回家後要如何處理 / 拿走那隻可怕的牛蜱，我個腦一片空白，心裏只求乖乖不要染上牛蜱熱！我同獅子王都冇信心如何鉗走而又唔鉗爆 (牠肚內可能有數百粒蟲卵！)那隻已緊緊叮住乖乖，吸血到肚滿腸肥的牛蜱！好彩，食飯地點對面就係奶茶光顧多年的獸醫診所！Yes 一於請獸醫處理！

                          
正所謂少年不知愁滋味，你睇乖乖入到診所幾開心！唉，難為佢亞媽我擔心到死！

連D姑娘都忍唔住話乖乖一入嚟就冇停笑，問佢知唔知係嚟睇醫生！？仲話佢咁精神到底乜嘢病？我唔夠膽係度講話乖乖有牛蜱呀，一定嚇C隔離左右D狗主！實雞飛狗走！

如坐針氈的等咗好耐，終於見到醫生，立即幫乖乖從頭頂鉗走隻牛蜱

睇下！同乖乖D毛皮差唔多色架！

 被吸血位損咗

Le隻就係可怕嘅吸血鬼！

醫生幫乖乖洗傷口

                                     

再檢查牙肉(Make sure血色素OK)

再全身check下有冇漏網之"蜱"

唉！乖乖你一定要冇事呀！未來數星期都要時時Monitor乖乖D牙肉顏色，小便顏色，食慾&精神情況，最好笑個醫生話Hap唔Happy都係indicator wor！OKOK乖乖唔該你keep住笑！

量體溫中

體溫正常！乖乖睇醫生真係好乖，姑娘都讚佢定

回到家中全屋吸塵，拖地，換床單攪衛生Make sure 冇其他恐怖牛蜱遺留在家！Last but not least同乖乖一齊祈禱求天父賜佢健康。真係身心俱疲的一日！

Le個"頭獎"真係一世狗中一次都嫌多！

今次都算係不幸中之大幸，如果唔係約咗奶茶食飯，茶包又幫眼睇下乖乖，隻牛蜱都唔知會留係乖乖幾耐！可能仲會生埋蛋！所以真係要多謝茶包呀！