幸福

本來諗住今日偷下懶唔寫blog，但無意中偷聽到一段好有趣的對話加上要remind下獅子王佢幾咁幸福...忍唔住又要執筆。
話說今晚獅子王唔返屋企食飯，我一個人費事煮就喺茶餐廳食飽先返屋企，食食下有兩位男士坐咗係我隔離枱。由於實在坐得太近，佢哋嘅conversation我"被迫"聽哂！
A男：點呀？新婚生活開唔開心呀？
B男：好忙！好多家務要做！又要吸塵，又要洗衫，又要熨衫，又要煮飯，又要洗碗！
A男：吓？你煮飯？你老婆唔係好叻煮嘢食嘅咩？
B男：佢好少煮飯架，煮嘅次數真係少之又少！
A男：唔係掛，我見佢facebook成日"po"D相，佢買咗好多厨具架wor！
B男：係lor，剩係買厨具唔煮架wor！
聽到Le度我差D忍唔住笑，偷偷"Gup"下B男個樣...Arr...肥仔，你俾人揾咗老襯啦Wakakaka！
A男：咁你要煮飯點解你唔叫你老婆幫下手分擔下其他家務呀？
B男：佢每日放工返嚟都話好攰！一食完飯就入房瞓覺！
我幾乎想答嘴話：車，邊個返工唔攰唔辛苦呀？我每日放工返到屋企話我想死添呀！咪一樣要做！你咁傻仔抵你做死啦！
Having said that，現今真越嚟越多男人會願意為自己老婆/女朋友煮飯兼做家務，我公司都有幾個，包括我嘅前老板！反而D女同事大部份都唔煮飯架wor！
我Le個前澳洲老細曾經同我呻，話有日收到佢老婆電話，問佢幾點返屋企？佢好興奮喺電話度問佢老婆：乜你好掛住我咩？點知佢老婆話：我好肚餓呀，你快D返嚟煮飯俾我食啦！Wakakaka笑死我！
我問老板點解唔請返個工人，佢話佢個香港人老婆食嘢好奄尖，剩係鐘意食佢煮嘅飯wor！我話：點解你唔特登煮得難食D，咁你老婆咪俾你請工人，你咪唔使做得咁辛苦lor！我老細即時對眼一亮，話我咁聰明！可惜，佢話識得我太遲wor！Wakakaka！
獅子王，請問你E家覺唔覺自己好幸福呢？