阿豬媽上身

我唔煲韓劇，更分唔清東方神起邊個打邊個，連G Dragon唱過D咩嘢歌我又唔知，難為我有兩個同事迷韓劇迷到一個去中大，一個返HKU學韓文！！每次測驗前仲要請假讀書，真係好認真呀！佢哋其中一個係東方神起嘅super fans一年內又去韓國又飛日本咁去睇佢哋嘅演唱會，真係唔講得笑！
我雖然唔係韓迷，但韓國美食我又Like wor，什麽人參雞、韓式燒烤、汁煮牛肋骨通通都愛！今日阿豬媽上身在家整咗個"零失敗"嘅韓式豬頭肉


點解"零失敗"？唔係我廚藝了得，而係我揾到"師父"幫手！一盒係韓式泡菜，另一包係韓式年榚醬，有咗Le兩樣嘢就算你唔識煮餸都能夠整到一碟似模似樣嘅韓國菜！
                          
豬頸肉用一般鹽、糖、胡椒粉、酒、生抽、蒜頭略醃(調味要比平時輕手！因為炒時仲要加泡菜&年榚醬)
                          
今日用杏鮑菇做配菜。我鐘意買Le隻細細盒嘅Kimchi一盒煮一餸唔使剩，由於佢只係有咸&辣味所以我覺得要加返D甜辣年榚醬就perfect而且個色仲會靚D架！
                                     
                                            先炒豬頸肉至半熟

加入杏鮑菇炒香，灒酒，加入泡菜炒勻

最後加入數湯匙年榚醬伴勻即成

Le個韓式豬頸肉帶點甜辣非常好送飯

再簡單在蝦膠灑上芝麻煎咗個芝麻蝦餅

青瓜先用鹽醃過，冲淨，再用XO醬加麻油撈勻做伴碟，簡簡單單兩樣餸又開飯lu