「吃喝玩樂」的乖乖

以往乖乖是一隻不折不扣既「裙腳仔」，成日跟出跟入；驚死你會賣甩佢咁款，但最近乖乖係有些少唔同左！點解我會有咁既感覺，皆因一向以來以為我係乖乖既主人，乖乖應該聽我話，叫佢停就唔會走，叫佢行就唔會企。但最近我開始發覺其實乖乖係我主人。點解？除左幫佢執A執L唔在講，仲有就係乖乖行；我就唔敢企，乖乖走我就唔敢停，還有就係出街佢行先、食飯佢食先、「目訓」覺佢「目訓」先！

而乖乖最近又同屋企附近幾隻「狗友」打得異常火熱，唔知係咪成日群埋呢班狗友，乖乖近排惹左唔少不良事好，成日只識「吃喝玩樂」，仲有係勁鍾意「索K」，唔係應該索「L」至真。

早幾日夜晚同乖乖主人散步，以往乖乖都唔會走得太遠，但係最近出現了失常事件，乖乖行行下竟然唔理我，跑落一條平日唔會去既樓梯，叫極都唔理會，仲越叫越走，我即時做左「阿崩」。但最大鑊就係我要飛奔直下，尋回乖乖主人，我接近一步乖乖又跑一步，我停佢又停；我見乖乖所行既方向，我懷疑乖乖想去搵佢既狗友Ja B & Mui Mui談心說笑，我當時唔知點好，路旁車輛又急，跑又唔夠佢快。卒之係條行人路；相距百碼、對峙足足5分鐘，我扮野越走越遠，這時乖乖才死死氣、唔多順咁跑返黎，我即時想打鑊金佢；點解乖乖會咁唔聽話、咁野性；唯一解釋，可能俾狗教壞了。